ازمة الثانوية العامة

اريد ان احيى وزير التعليم يسرى الجمل على امتحانات الثانوية العامة لهذا العام لسببين
اولا: استطاع ان بلهى الرأى العام المصرى لمدة شهر كامل عن مشاكل البنزين و تراخيص السيارات و ارتفاع جميع الاسعار و جميع المشاكل المعتادة
ثانيا (و ده بجد بقى): هو المطلوب ان نتيجة الثانوية العامة تكون معجزة و نصف الطلبة اللى داخلين الامتحان يجيبو فوق ال 90 %, ازاى يعنى؟؟
النتيجة الطبيعية العلمية فى الدول الطبيعية (الىى طلبتها مش طلبة عباقرة زى عندنا) ان معظم الناس تكون فى حدود 75-85% و المتفوقين يكونوا فوق ال85% و الغير متفوقين تحت ال70%, انا لا اطالب ان يسقط الطلاب لكنى اطالب ان تكون النتائج طبيعية وان يكون صاحب ال90% فعلا يستحقها

و ان كنت اتمنى ان يكون هذا هو قصد الوزير لكنى اشك انه يقصد هذا الهدف و لكن للاسف الحلو ميكملش فيطلع البيه و يقولك هنعيد توزيع الدرجات,
مين يا خويا؟؟؟؟؟؟ يعنى اللى استفدته ضيعته تانى (علشان كده اشك انه يقصد الهدف التانى السابق ذكره) و كمان ازاى يكون الطالب بيحل سؤال و هو عارف ان عليه 5 درجات يروح البيه يخليه بدرجتين بس علشان باقى الطلبة مش عارفين يحلوه, يعنى الواد ذنبه انه ذكى,
و حاجة كمان طالما انت عارف ان السؤال ده صعب و مينفعش الطلبة البهوات بتوعنا اللى بياخدوا المنهج فى كوبايات عصير الدروس الخصوصية يحلوه بتحطه ليه و بعدين تغير توزيع الدرجات يا اما تشيل السؤال يا أما تكون درجته بسيطة علشان كا الطلبة تكون نتيجتها 98 % ولا هى منظرة ووجع دماغ على الفاضى

بالنسبة للطلاب بقى: صعوبة الامتحان فى صالحكم لانه سيهدئ من المجاميع و ينزل المتوسط طالما الصعوبة على الجميع, و هنا يظهر الفارق بين الطالب المتوسط و المتفوق بدلا من ان يكون كليهما مجموعه 95% فعندما كانت المتحانات صعب فى الفترات السابقة و يدخل الطلاب كلية الطب ب 70 % و اقل, و بسبب ان النتائج الخرافية 98% و 102% بقى اللى بيجيب 95% مش لاقى كلية و الكلام ده مكانش موجود زمان علشان كده كانت الدنيا بخير.
و عندما ينزل متوسط المجموعات سيستطيع الطالب الذى يكون مجموعه 80 او 85 % يدخل كليه محترمة لم يكن فى استطاعته دخولها بال 95 %التى كان سيصل لها لو كان الامتحان سهل لان هناك احد المتوسطين ربنا موفقه و عرف يحل شوية و يأخذ مكانه فى الكلية


اتمنى من الوزير ان يستمر على هذا النظام والا يضيعه باعادة توزيع الدرجات ليكون التنسيق افضل, و ارجو من الطلبة الا يتأثروا بهذه الصورة انا سمعت كلام زى مؤامرة , تعجيز و كلام عجيب كده, اللى ربنا كاتبه هيجى و طالما عملت اللى عليك فربنا هيوفقك و تأكد ان صعوبة المتحان لصالحك و ليس ضدك.

ملاحظة اخيرة: معظم الامتحانات الصعبة كانت فى قسم علمى رياضة و هو على اى حال تنسيقه هادئ قليلا فصعوبة الامتحانات لن ثؤثر كثيرا على النتيجة.