هو انا اللى هاصلح ( او هغير) الكون؟
جملة بنسمعها كتير فى الشارع. سؤال استنكارى بيعبر عن اللامبالة و الأنانية
- تلاقى واحد بيرمى منديل او كيس فارغ فى الشارع, و لما تقول له ليه كده؟ يرد عليك ما الشارع مليان مناديل و اكياس يعنى هو انا اللى غير الكون؟
اه, انا و انت و هو لو سيبنا الشارع نظيف و مرميناش القمامة فيه هيظل نظيف و يبقى انت غيرت الكون
- لما واحد يتأخر عن موعد و لا يعتذر و لما تكلمه يقولك يعنى لو جيت فى ميعادى ده اللى هيغير الكون
اه هيغير الكون, لو كل واحد حافظ على مواعيده و التزم بها اليوم هيكون اكثر انتاجية
الناس الايام ديه بتتكلم فى كسر الدقيقة و احنا بنتكلم فى الساعة و الساعتين
سمعت مرة ان مسئول يابانى بيتكلم عن موضوع التأخير ده و بيقول "الناس بتقول ان الموظف اليابانى ملتزم و مش بيتأخر, انا مش موافق على الكلام ده. الموظف اليابانى بيتأخر زى باقى الناس.
ده فى موظفين بيتأخروا 3 و 4 دقائق ده حتى فى ناس بتتأخر 5 دقائق"!!! و طبعا لا تعليق
- لما تلاقى واحد مش ملتزم بالقواعد و القوانين بداية من قواعد المرور و القواعد و الاخلاقيات المنظمة لأى ز و نشاط او تجمع مرورا بالسرقة و الرشوة و الفساد و التحرش و اعطاء الحق لغير مستحقيه و عدم احترام الاخر و عدم احترام حقوقه و غيرهم الكثير وصولا الى القتل و يقولك ما الناس كلها كده هو انا اللى هغير الكون؟
اه انت اللى هتغير الكون لان لو انا و انت و غيرنا التزمنا الدنيا هتبقى منظمة و كل واحد عارف حدوده و واجباته و هياخد حقه او على الاقل الغير ملتزمين هيقلوا واحد النهاردة و واحد بكرة و واحد بعده
- لما تلاقى واحد مش عاجبه حاجة و ميتكلمش و يقول لك هو انا هغير الكون
اه هتغير الكون, مش يمكن كلامك يؤثر عليه و حتى لو لم يؤثر المرة ديه ممكن يؤثر بكرة او مع شخص تانى
امثلة لاشخاص غيروا العالم ،تصور معايا لو الناس دى فكرت كده
- لو كان صلاح الدين قال الصليبيين هزموا كل الامم اللى قبلى هو انا اللى هغير الكون و انتصر عليهم
- لو كان نيوتن لما وقعت التفاحة عليه و سأل نفسه هى التفاحة وقعت ليه؟ اكل التفاحة و قال و انا افكر ليه هو انا اللى هغير العالم؟
- لو كان د. أحمد زويل قال لما قابلته جامعة الاسكندرية طلبت منه ان يتنازل جميع زملائه عن المنحة اللى المفروض جاية بإسمه او لما قابلته مشاكل فى بحث من الابحاث بتاعته خلاص اعمل ايه هو انا هغير الكون؟
هتقولى انا فين و الناس دى فين هقولك لو مش هتقدر تعمل اختراع تقدر على الاقل انك تغير نفسك و تكلم غيرك و تقنعه انه ممكن لما يغير نفسه يغير الكون و يمكن يكون لك دور اهم مين عارف المستقبل شايل لك ايه؟
و زى ما اوباما بيقول: ايوة نقدر
YES WE CAN
- على سيرة اوباما لو كان قال هو انا اللى هغير الكون واكون اول اسود يحكم امريكا؟
و اديسون و وات و و و و و و و غيروا العالم
انا لو حبيت اجيب امثلة اكتر مش هاخلص و النوت دى مش هتخلص
بس انا حبيت اقول ان انا و انت و هو و هى لو بطلنا سلبية و انانية هنغير الكون
ليست هناك تعليقات:
إرسال تعليق